அவன் வாழ்க்கை

 

கொக்கரக்கோ கூவையிலே

கோலமிடுவாள் கோமலவள்ளி

 

குக்கூக்கூ கூவையிலே

துயிலெழுவான் கோபாலன்

 

துள்ளியோடும் காளையோடு

பிள்ளையோடு சென்றிடுவான் – கழனிக்குப்

பிள்ளையோடு சென்றிடுவான்.

 

தந்தைக்கு முத்தமிட

நெற்கதிர்கள்

வளைந்து நிற்கும்.

 

அன்போடு அரவணைக்க

இன்முகத்தோடு

நீர் வார்ப்பான்.

 

முத்துப்பனி கொடுமையிலிருந்து

முழுதாக நீங்கிடவே

முதல்வனை நோக்குகிறான் – உழவன்

முதல்வனை நோக்குகிறான்.

 

கட்டுக் கட்டாய் கத்தை கட்டி

கழனியிலே மூட்டை கட்டி

முத்து முத்தாய்ப் பணம் சேர்ப்பான்

மூன்று நாளும் விழா வைப்பான்.

 

பொங்கல் எனும் திருநாளில்

பொங்கி வரும் கடலலையும் – இவன்

பொங்கலிலே மறைந்து நிற்கும்.

 

பின் அவன்,

கொண்டவளின் கழுத்துக்குக்

கொத்து மாலை தங்கத்திலே.

 

மேனி பட்டதாலே

பருத்தி ஆடை

ஜொலி ஜொலிக்கும்

 

இன்பம் எனும் கடலினிலே

அவன் வாழ்க்கைப் படகு செல்லும்.